Ika, ika, ika… KORRIKA!

Kultura Astearen egitarauaren barruan, Kirol Eguna modu ezinhobean ospatu dugu. Izan ere, aurten Korrikan parte hartu ahal izan dugu Udalari esker, lekukoa eramateko gonbidapena egin digutelako. Eskolako gaztetxuenek ere haien ibilbidea egin dute eskola-inguruan.

Pozik eta harro gaude, Gorondaganen ere, euskararen alde!

Kultura Astea

Udaberriko oporrak ate-joka ditugu eta, eguzki-izpien beroaren zain gauden honetan, martxoaren 18tik 22ra bitartean eskolan izango dugun Kultura Asteak gorputzak mugiarazi eta bihotzak alaituko dizkigu.


Dantza, kanta, hitzaldi, irakurraldi eta askotariko ekintzak prestatu ditugu astelehenetik ostiralera bitartean eta, ostegunean, martxoaren 21ean, KORRIKAren ibilbidea egingo dugu bai herrian baita eskolaren inguruan ere. 

Ipuin Lehiaketako sari-banaketa

Urtero legez, Gorondagane eskolako ikasleekTxorierriko Mankomunitateak antolatutako Ipuin Lehiaketan parte hartu dute. Saridun batzuk ditugu gure artean eta, haien lana goraipatzeko, sari-banaketa ekitaldia egingo da martxoaren 15ean Goronda Beko kiroldegian. Lehiaketan parte hartu duten ikasle guztiak daude gonbidatuta ekitaldira eta oso ondo pasatuko dute Asier Kidam magoaren ikuskizunari esker.

Itsasoa gara…

Eguraldia ez dugu izan lagun baina, hala ere, ilusioz ekin diogu dantzatzeari eta abesteari, Inauteriak gogotsu ospatzeko.

Agate Deuna

Agate Deunaren omenez, Gorondagane Eskolako ikasleek, euskal tradizioko jantziak soinean eta makilak eskuan, kantaldia egin dute.

Bat, bi, hiru… ieup!

Euskararen Astea: eskerrik asko denoi!

Aurreratu genizuen bezala, azaroaren 27tik abenduaren 1era bitartean Txorierriko eskoletako ikasleek Euskararen Eguna Sondikan ospatzeko aukera izan dute. Antolakuntza-lanean ibili izan gara eskolan eta, hemendik, eskerrik asko gure eskolara etorri ziren ikasle eta irakasle guztiei, ilusioz eta gogotsu antolatu dugu Gorondagane eskolako kide guztiok zuen harrera eta espero dugu guk bezain ondo pasatu izana.

Hona hemen bideotxo bat: EUSKARAREN ASTEA

Azaroak 25

Azaroak 25 Emakumeen aukako indarkeria desagerrarazteko Nazioarteko Eguna da eta CEP Gorondagane HLI eskolak bat egin du egun horretako aldarrikapenarekin.

Euskararen Eguna, aurten Sondikan

Aurten Txorierriko Euskararen Eguna 2023 Sondikan ospatuko da. CEP Gorondagane HLI eskolak ospakizun horietan parte hartuko du, Mankomunitatearekin eta Udalarekin elkarlanean, antolatzaile gisa.

Ilusioz eta gogotsu ari gara prestaketa-lanetan, Txorierriko gainontzeko eskoletatik etorriko diren ikasleei harrera bikaina egingo diegu eta elkarrekin gozatuko dugu ikuskizunez. Lehen Hezkuntzako seigarren mailako ikasleek egingo dituzte harrera eta agurra, haiek prestatu dute bertsoa eta, horrez gain, herrian antolatuko den bertso-ekitaldian parte hartuko dute. Gainontzeko taldeetako ikasle guztiek euren ekarpena egingo dute prestaketa lanetan eta eskualdeko ikasleek esperientzia zoragarria biziko dute, gure ‘aireportura’ etorriko dira, azafata, pilotu, maleten zinta, hegazkin-pista, gonbidapen…

Hegaldia elkarrekin egingo dute, EUSKARAZ!